'होय फक्त मराठीच'..........!
मराठी माणूस आहे, मी चाल माझी वाघाची
कोणासही न जुमानणारी नजर आहे रागाची !
येथल्या काळ्या मातीचा गर्व आहे मजला भारी
देव मानतो विठोबाला करतो पंढरीची वारी !
माझाच आहे सह्याद्री आणि त्याच्या पर्वत रांगा
कृष्ण कोयना वेण्णा यांना मानतो आम्ही गंगा !
मराठी रयतेचा आहे शिवबाच फक्त जाणता राजा
मुलुख सारा मावळ्यांचा करतो आजही गाजा वाजा !
येथल्या मातीत आहे समतेचे सारे पाणी
शाहू फुले आंबेडकरांची गातात येथेच गाणी !
अजूनही ओळखले नसले तर आता तरी जाणा
मराठी बाणा आमच्या ह्रदयातील काळीज माना !
'होय फक्त मराठीच' पुन्हा एकदा ठणकावून सांगतो
तरीही ज्ञानोबा तुकोबांच्या शांतीचे पसायदान मागतो !
महाराष्ट्राचे गर्व गीत आम्ही जोराने गाणार
मराठी रयतेचा झेंडा आम्ही अटकेपार नेणार !
--- बिपीन जगताप
