मी आहे साधा माणूस ..!

मी आहे साधा माणूस ..!

मी नाही संत नाही विचारवंत 

माझा नाही कोणताच  पंथ

मला कोणीच भेटला नाही महंत

मी अडाणी आहे हीच मोठी खंत !

मला अध्यात्म नाही कळत 

माझे मन देवाकडे नाही वळत 

मला खूप गंभीर होता येत नाही 

मला खूप ताणही घेता येत नाही !

मी सारे जग बदलू शकत नाही 

मी जगाला साधा विचार देत नाही 

मला माझ्या गावातही पुरेसे ओळखत नाहीत 

जगाने ओळखावे अशी स्वप्नातही इच्छा होत नाही !

माझी  कधी मोह माया सुटली नाही 

अजूनही मातीची नाळ  तुटली नाही 

लोकांच्या दुखः त  मी दुखः मानतो 

लोकांच्या सुखात मी मनसोक्त नाचतो !

मी माझ्यापुरता फक्त बदलीन म्हणतोय 

उद्या सुरुवात करीन असं मनाला सांगतोय 

पण रोजचा दिवस मला नवा नसतोय 

माझ्याच  मनाला मी दररोज हसतोय ! 

         --- बिपीन जगताप